Kategoria I - Turbina vë në diskutim vazhdimin e kampionatit

admin

Futbollistët e Turbinës kanë bojkotuar seancat stërvitore që prej ditës së hënë dhe, sipas të gjitha gjasave, rrezikon të luhet ndeshja me Laçin. Pas fitores me bilishtarët, skuadra cërrikase ka vënë në jetë atë që kishte paralajmëruar në fund të javës së shkuar. Shkak i bojkotit është rroga e shtatorit, që nuk është paguar për futbollistët. Kapiteni Rigers Turtulli sqaron se futbollistët nuk duan t’ia dinë për mosmarrëveshjet mes drejtuesve të Turbinës, pasi atyre u intereson korrektësia nga ana financiare. “Nuk e kuptoj pretendimin e drejtuesve të Turbinës, kur ne ende nuk kemi marrë rrogat e para, edhe pse kemi gati dy muaj që stërvitemi. Nuk na interesojnë mosmarrëveshjet e krerëve të skuadrës, por respektimi i kontratave dhe mundi e djersa jonë. Nëse nuk paguhemi deri ditën e premte, askush të mos presë që të shkojmë në Laç,” - tha për “Sportin shqiptar” Turtulli.

Me grupin e futbollistëve bojkotues janë solidarizuar edhe elbasanasit Sadiku, Suta dhe portieri Toçi. Nga ana tjetër, asnjë nga krerët e Turbinës nuk u përgjigjet futbollistëve. Burime konfidenciale bëjnë me dije se shkak për vonesat e pagesave të futbollistëve është bërë bashkia. Sipas këtij burimi, fondi i akorduar për muajin shtator është përgjysmuar nga bashkia, me pretekstin se nuk mund të paguajë një pjesë të stafit teknik me 50.000 mijë lekë në muaj.

Turbina ndodhet në vend të 4-t dhe po has vështirësitë e para. “Jo vetëm unë, por çdo futbollist, kur nënshkroi kontratën, besonte që krerët i kishin rregulluar punët, por situata qenka njësoj. Probleme kanë edhe skuadrat e tjera, por ato i zgjidhin shpejt. Po të vazhdohet kështu, Turbina do të shpërbëhet dhe është vërtet për të ardhur keq për tifozërinë cërrikase,” - ka përfunduar kapiteni Turtulli. Ndoshta paralajmërimi i futbollistëve ishte parë si një presion, por tashmë është bërë realitet. Bojkoti i ndeshjes me Laçin mund të bëjë që FSHF-ja ta fshijë nga lista skuadrën e Turbinës.

Shkruaj Koment

Sporti Shqiptar