Superliga - Shkumbini rrezikon humbjen në tavolinë

admin · Superliga - Shkumbini rrezikon humbjen në tavolinë

Shkumbini rrezikon humbjen në tavolinë për ngjarjet e së shtunës, ku në tunelin e stadiumit lojtarët dhe trajneri i Besës janë dhunuar. Deputeti Dashnor Sula, trajneri i portierëve peqinas dhe dy persona të tjerë, kanë rrahur disa futbollistë kundërshtarë, mes të cilëve Bekim Kuli përfundoi në spital dhe doli me tre qepje në buzë dhe teknikun Ilir Daja në pushim të ndeshjes. Sipas rregullores së sezonit të kaluar (rregullorja e re nuk është publikuar ende), në nenin 24, pika 18 të Kodit të Drejtësisë Sportive parashikohen gjoba të rënda financiare, të cilat fillojnë nga 100 mijë deri në 500 mijë lekë të reja dhe humbje 2-0 në tavolinë. "Kur gjatë ndeshjes ushtrohet dhunë fizike nga publiku, lojtarët apo drejtuesit e ekipit ndaj gjyqtarëve dhe lojtareve kundërshtarë, ka kërcënime, bëhet presion, goditen me sende të forta, goditen me shkelma, grushte apo sende të tjera, veprime të cilat nuk lejojnë zhvillimin normal të ndeshjes, ekipi humb ndeshjen 2-0 në tavolinë dhe gjobitet me 100000 lekë deri në 500000 lekë të reja", citohet në rregulloren e lojës. "Kjo masë vlen edhe në rastet kur gjyqtari nuk e ndërpret ndeshjen, për të mos krijuar probleme të mëtejshme. Për këtë vendim, ai duhet të njoftojë vëzhguesin dhe delegatin e ndeshjes të përcaktuar nga Federata e Futbollit".

Precedentët - Më 17 tetor të vitit 2006, Shkumbini është dënuar me zhvillimin e gjashtë ndeshjeve në fushë asnjanëse dhe 300 mijë lekë të reja gjobë nga Komisioni i Disiplinës. Shkak u bë dhuna pas humbjes 2-0 me Partizanin. 20 minuta përpara përfundimit të asaj ndeshjeje, shoqëruesi i presidentit Xhani ka filluar të debatojë me tifozët peqinas në tribunë dhe në pak sekonda ngjarja ka degjeneruar. Në atë periudhë, njëshi i të kuqve rrezikoi seriozisht dhe deklaroi se me të në krye, Partizani nuk do të luante më në fushën e Shkumbinit. Por, një tjetër episod, që ka pasur sërish si protagonist deputetin Sula, është regjistruar në mars të vitit 2008, në derbin Elbasani-Shkumbini, të fituar 1-0 nga vendasit. Përfaqësuesi i qytetit të Peqinit në Parlament goditi me grusht ish-mbrojtësin maqedonas të verdhebluve, Nikola Karçev, pas një debati të ashpër në fund të ndeshjes.

Pushtetarët - Federata Shqiptare e Futbollit vazhdon të shprehet e pafuqishme përballë dhunës së pushtetarëve në stadiumet shqiptare. Në mars të vitit 2008, gjyqtari Guçe është rrahur pas ndeshjes Iliria-Albpetrol nga deputeti i zonës, Hajrullah Paturi, që më pas e pranoi publikisht dhunën ndaj "xhaketës së zezë". Pas rikthimit të dhunës në Kategorinë Superiore, pikërisht në fushën e nxehtë të Peqinit, shefi i Garave, Ilir Shulku, është shprehur se kur dhuna vjen nga deputetët, institucioni që drejton futbollin e ka të vështirë ta zgjidhë problemin e dhunës. "Duhet të jemi të ndërgjegjshëm se kur dhuna vjen nga deputetët, edhe ne e kemi të vështirë që t‘i zgjidhim këto probleme", tha Shulku. "Po presim relacionet e të dërguarve të FSHF-së dhe gjyqtarëve për të zbardhur ngjarjen dhe më pas ajo do t‘i kalojë për shqyrtim Komisionit të Disiplinës. Personalisht i kërkova sot (dje) inspektorit të Disiplinorit që të fillojë hetimet për gjithçka ndodhi në Peqin". Gjithsesi, qëndron fakti se për momentin drejtuesit e ekipit kavajas ende nuk kanë paraqitur asnjë ankesë zyrtare në federatë, në mënyrë që të fillojë shqyrtimi i episodit që prej kësaj jave.

Shkruaj Koment

Gazeta Shqip