KF Tirana

Partizani_One · Posted: Mon Apr 21, 2008 1:58 pm Post subject:

Mema: Fitorja, na ka rritur moralin
21 Prill Pas fitores së thellë ndaj Vllaznisë, trajneri i bardhebluve, Sulejman Mema, edhe pse nuk e shpreh hapur entuziazmin për lojën e skuadrës, me atë çka tha në prononcimin e tij për “Sport Ekspres” kuptohej që ishte tejet i kënaqur, sidomos kur thotë: “Loja e skuadrës sonë, në momente të caktuara, ishte edhe argëtuese. Tirana tani, jo vetëm fiton, por dhuron edhe spektakël, sepse i ka lojtarët për ta bërë këtë. Gjithsesi, me më tepër shpirt gare them se do të qe një skuadër edhe më dinjitoze”. “Unë dua që Tirana të luaj shpejt e fort gjatë gjithë kohës. Do të më pëlqente të mos reshtëte së godituri portën, sidomos nga distanca të largëta. Për mendimin tim, them se është një Tiranë e mirë, çka dëshmon edhe për mundësitë që ka futbolli ynë” ka nënvizuar trajneri i bardhebluve.“Do të insistojmë fort dhe do të bëjmë gjithçka, për t’u ngjitur në renditje sa më lart të jetë e mundur”, ka pohuar Mema, duke pas parasysh më së pari vendin e tretë. Duke u kthyer te ndeshja e së shtunës të kaluar, tekniku ka thënë se të gjithë luajtën mirë dhe e ka të vështirë të bëjë dallime, megjithatë: “Do të veçoja Duron, pa harruar që kualitetet te Tirana në përgjithësi luajnë mirë”.

Finalja e Kupës ? Përtej vlerave morale e “materiale” të fitores së thellë, Mema nënvizon faktin se ajo ndeshje do të ndikojë shumë pak për finalen e Kupës së Shqipërisë me Vllazninë, më 7 maj. “Them kështu, ? thotë Mema, ? ngaqë Vllaznia tashmë mendon vetëm për atë ndeshje finale. Gjithsesi, për ne kjo fitore ishte pozitive dhe na dha më shumë moral”.

Kçira, mungesa në derbin me Partizanin

Kanë qenë minutat përmbyllëse të ndeshjes të së shtunës, kur për shkak të një ndërhyrjerje nga prapa, ndaj një futbollisti shkodran, gjyqtari Velçani e ka ndëshkuar me karton të verdhë qendërmbrojtësin e Tiranës, Lekë Kçira. Kështu, numri i kartonave të verdhë për shqiptarin me pasaportë kroate ka shkuar në tre, çka do të thotë që në derbin e së shtunës, me të kuqtë e Partizanit, nuk do t’i shërbejë skuadrës. Të verdhin e parë Kçira e pati marrë në “Niko Dovana”, në javën XXI ndaj Teutës, kurse të dytin në transfertën me Besën, kur me ndërhyrjen ndaj Fortunat shkaktoi edhe penalltinë, që u dha fitoren kavajasve. Kçira do t’i bëjë shoqëri në tribunë Vrapit, që po për shkak të kartonave të verdhë do të jetë edhe këtë javë i pezulluar.

Të paaktivizuarit, në stërvitje

Fakti që të mërkurën, më 23 prill, Tirana ka për të zhvilluar ndeshjen e dytë gjysmëfinale për Kupën e Shqipërisë, me verdheblutë e Elbasanit, ka detyruar stafin tknik që dje paradite të kryejë një seancë stërvitore në “Skënder Halili”, me grupin e futbollistëve, që nuk u aktivizuan në përballjen me Vllazninë. Ndërsa sot, në orën 16:00, po në “Skënder Halili”, grupi i bardhebluve do të jetë i plotë në stërvitje.

Neri, në Leçe

Për shkak të një problemi familjar, Stefano Neri, përgatitësi atletik i Tiranës, të shtunën paradite ka udhëtuar për në Leçe. Gjithsesi, edhe pse larg, gjatë gjithë kohës së ndeshjes e pas saj, italiani ai ka komunikuar nëpërmjet celularit me pjestarë të stafit, të cilët i ka uruar për fitoren. Neri do të jetë në Tiranë të mërkurën paradite, në prag të ndeshjes për kupë me Elbasanin. B.A
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Wed Apr 23, 2008 1:14 pm Post subject:

Mema nuk do “faleminderit”
23 Prill “Qëllimi kryesor është që t’i fitojmë të dyja ndeshjet si me Partizanin ashtu dhe me Dinamon”

Mema rrëfen përgatitjet intensive, që është duke bërë me futbollistët e tij këto ditë. Një javë pa dyshim tejet e ngarkuar për bardheblutë, ku në harkun e pak ditëve u duhet të përballen me dy nga skuadrat më të mira të kampionatit, sot me Elbasanin e vendit të pestë në gjysmëfinalen e Kupës dhe Partizanin e vendit të dytë në derbin nr.3 të kampionatit. “Kemi mundur Vllazninë thellë, ? thotë Mema, ? por forcën e saj të vërtetë, skuadra jonë duhet ta tregojë në derbet me Partizanin dhe Dinamon. Atëhere po, nëse do të arrijmë të fitojmë në këto përballje do të themi se jemi në formën e duhur. Gjithsesi, duke mbetur tek takimi me Partizanin do të thoja që të shtunën ndaj këtij ekipi shpresojmë që gjithçka të jetë në anën tonë. Natyrisht e dimë që nuk do ta kemi të lehtë, por e gjithë vëmendja jonë është përqendruar tek kjo ndeshje. Eshtë derbi i madh i kampionatit, i fundit për këtë sezon, por njëherësh është edhe mundësia jonë më e mirë për t’i kënaqur dashamirësit e skuadrës, të cilët sigurisht si objektiv kryesor kemi që t’i kënaqim edhe me fitimin e Kupës së Shqipërisë. Sidoqoftë, por fitorja e Tiranës në derbin me Partizanin, pse jo dhe me Dinamon, do të ishin dhurata të bukura për ta. Do t’i gëzonin e qetësonin shumë, dhe natyrisht do bënte t’ia “falnin” skuadrës ato hapa të shumtë fals, që ka bërë sivjet”.

“S’flas për merkato përpara derbit”

Në valën e punës për nisjen e stërvitjes me grupin e futbollistëve, kreu i pankinës bardheblu, tekniku Sulejman Mema nuk ka patur dëshirë të zgjatet e të komentojë në lidhje me ato çka janë thënë për një komunikim të tij me sulmuesin e Partizanit, Arbër Abilaliaj, ku bëhej fjalë për një kalim të mundshëm të vlonjatit të të kuqve sezonin e ardhshëm tek Tirana. “Ndodhemi në prag të një ndeshjeje të rëndësishme, ? ka thënë për “Sport Ekspres”, tekniku bardheblu ? siç është derbi i së shtunës me Partizanin, pa harruar kurrsesi që kemi edhe sot ndeshjen e kthimit gjysmëfinale për Kupën e Shqipërisë me Elbasanin. Ndaj them se, e mira e punës tani për tani e do të mos merremi me këto gjëra”. Kurse lidhur me “saldimin” e Jahmir Hykës tek Tirana edhe për sezonin tjetër ka shtuar: “Nuk ka trajner në botë që të mos i dojë lojtarët e mirë në skuadër. Hyka në mënyrë të padiskutueshme është futbollist i talentuar, pa thënë që është edhe djalë i sjellshëm e punëtor. Mirë do t’i bënte të rrinte edhe pak në kampionatin shqiptar e më pas të kalonte jashtë shtetit. Ndërkohë mendoj është normale që një trajner t’u sugjerojë drejtuesve të klubit për një futbollist, të cilin ai dëshiron ta mbajë në ekip. Këtë gjë në lidhje me Hykën e kam bërë, po kurrsesi unë nuk jam marrë me caktimin e shumës së pagës. Me këtë aspekt merren donatorët, unë vetëm stërvis skuadrën”, ka përfunduar Mema.

Në Kupë, një lloj testi kundër të kuqve

Fakti që skuadra bardheblu është grumbulluar mbrëmë në hotel “Linza Chateau”, dëshmon që drejtuesit e FK Tirana, por edhe stafi teknik i skuadrës i kanë kushtuar vëmendjen e duhur, ndeshjes së dytë gjysmëfinale me Elbasanin. Do t- ishte e tejkaluar të mendoje se te Tirana ka ndonjë dyshim për kalimin në finale të këtij kompeticioni, ndaj duhet marrë disi me rezervë deklarimi i trajnerit Mema: “Sigurisht që jemi përgatitur, ? thotë tekniku bardheblu, ? madje, me shumë kujdes dhe mirë”. “Ne vërtet kemi arritur rezultat të thellë e të pastër në transfertën e para dy javëve, por specifika e veçantë që kanë ndeshjet e Kupës të detyron të mos e lësh jashtë vëmendjes takimin e sotëm. Pra, është një ndeshje tjetër, e cila me të drejtë mund të quhet “pjesa e dytë” e gjysmëfinales me Elbasanin. Parë në këtë prizëm ne kurrsesi nuk mund ta neglizhojmë takimin e sotëm me Elbasanin”. Në fakt, eksperienca ka treguar më se një herë se neglizhenca e tepruar mund të të çojë në “harakiri”. Por, ajo që në të vërtetë “zien” te Tirana është derbi. Dhe Mema natyrshëm kërkon ta mbajë të motivuar skuadrën, duke i bërë dhe paralajmërime të kësaj natyre. Kjo është dhe arsyeja që, edhe pse nuk e ka shpallur formacionin, tekniku të përpiqet të modelojë sot, atë që skuadër që do të hedhë në fushë të shtunën përballë Partizanit. Dhe duhet të fitojë në kohë, aq më tepër që nuk ka ç’pret: mbrojtja duhet ribërë...
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Thu Apr 24, 2008 1:36 pm Post subject:

Fagu: Partizani, fatin e shkodranëve
24 Prill Edhe pse nën peshën e humbjes, që kishin pësuar nga verdheblutë e Elbasanit në ndeshjen e djeshme, 21?vjeçari i Tiranës, Erbim Fagu, gjithsesi është treguar i gatshëm të shprehet për derbin e së shtunës me Partizanin. Madje, që në fjalët e para, “polivalenti i vogël” i kampionëve është treguar i prerë në deklarimin e tij: “Nuk është fjala për t’u mburrur, por unë jam i bindur që të shtunën, në përballjen me ne, Partizani do të ketë fatin e Vllaznisë. Do të ballancojmë bilancin e sezonit me të kuqtë. Këtë gjë na e kërkojnë tifozët, por edhe ne duam ta bëjmë realitet. Vërtet në ndeshjen e kthimit gjysmëfinale u mundëm nga Elbasani, por Kupa e Shqipërisë ka tjetër specifikë. Nisur nga kjo, kualifikimi për në finalen e saj, në një farë mënyre, ishte garantuar që në ndeshjen e luajtur para dy javëve. Madje, ishte pikërisht kjo, për mendimin tim, që ndikoi në paraqitjen e dobët që bëmë në këtë ndeshje. Pa thënë që shumë nga ne edhe u ruajtën disi, jo vetëm për mos u dëmtuar, por edhe për të mos u konsumuar në aspektin fizik. Megjithatë, duhet pranuar që, edhe nëse mund të ketë ndodhur, nuk kemi bërë mirë, sepse, si rrodhën ngjarjet, mund të na kushtonte shumë shtrenjtë. Por kurrsesi nuk do të ndodhë kështu të shtunën, në “Qemal Stafa”. Nuk ka dyshim që në atë ndeshje, në Tempullin e futbollit shqiptar, do të jetë Tirana e ndeshjeve shumë të mira, që ka zhvilluar javët e fundit me Elbasanin, në kampionat e Kupë, me Besën e Kavajës (pavarësisht se nuk fituam, loja jonë ka qenë shumë e mirë), me Skënderbeun e me Vllazninë. E them me bindje të plotë këtë, sepse ne jemi të vendosur për të qenë dinjitozë deri në fund të kampionatit”, ka përfunduar 21?vjeçari Erbim Fagu.
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Thu Apr 24, 2008 1:36 pm Post subject:

Alarmi i Memës : Gabova rëndë!
24 Prill

Nuk kishte ndodhur asnjëherë nëpër stadiumet tona dhe nuk gabojmë nëse themi se dje, në “Selman Stërmasi”, ajo ndodhi për herë të parë(!). Themi kështu, sepse rëndom jemi mësuar që sidomos në rastet kur skuadrat vendase humbasin, trajnerët “zhduken” e “arratisen” nga stadiumet pa u shprehur përpara gazetarëve, thua sikur fajin për disfatën ia kanë patur ata. Por pas ndeshjes së djeshme ka qenë tekniku Sulejman Mema, që ka nxituar me ngut të shprehet përpara medias. Shpërfytyrimi, që kanë pësuar bardheblutë përpara syve të tij, domosdo ka ndikuar shumë dhe e ka shtyrë teknikun të “rrëfehet”.

“Kam gabuar rëndë, ? ka pranuar Mema, ? por gjithsesi unë di të nxjerr mësime nga ky shpërfytyrim i skuadrës në ndeshjen me Elbasanin. Kam gabuar te formacioni që kam ndërtuar dhe e nxorra në fushë. Veprova kështu, nisur nga fakti që duheshi ruajtur forcat e disa futbollistëve, ngaqë ngarkesa e tyre këto ditë ka qenë disi e madhe, sepse kanë luajtur dy ndeshje në javë, por sigurisht edhe për të akumuluar energji e për të qenë të freskët për ndeshjet në vazhdim”. I dukshëm shqetësimi i Memës, sidomos kur nga derbi me të kuqtë e ndajnë vetëm pak më shumë se 48 orë. Ndaj, edhe pse nuk e thotë, kuptohej që ai e kishte konceptuar si test për derbin e së shtunës ndeshjen e djeshme me Elbasanin. Aq më tepër kur dihet që nuk do të ketë shërbimin e Vrapit e të Kçirës në qendër të mbrojtjes. Madje, ka shpresuar shumë tek alternativat e tij. Por duket zhgënjimi i madh i trajnerëve të bardhebluve, kur thotë para gazetarëve: “E patë se ç’kontribut dhanë në fushën e lojës disa nga futbollistët, që unë i aktivizova ndaj Elbasanit që nga minuta e parë?”. Ndërsa më pas, nisur nga ato çka thotë, duket që në disa gjëra pas kësaj do të jetë kategorik. “Pas kësaj ndeshjeje, ? vijon trajneri i Tiranës, ? do të merrem vetëm me futbollistët që i kam primarë për në formacion. Duke nisur që nga sot, për mua futbollistët e tjerë mund të jenë thjesht plotësues të formacionit në momente të caktuara, por kurrsesi lojtarë që garantojnë të ardhmen e Tiranës. Futbollistë të tillë, aq pak të impenjuar në fushë, unë nuk kam parë”. I pyetur nga gazetarët se sa do të ndikojë në derbin e së shtunës kjo paraqitje e dobët e Tiranës, Mema dha këtë përgjigje emocionale: “Tani për tani jam duke menduar vetëm largimin e këtij sikleti, që hoqëm në gjysmëfinalen me Elbasanin”, ndërkohë që në krye pati theksuar se “....unë di të nxjerr mësime...”. Madje, jo një herë ka ditur ta bëj mirë këtë. Gjithsesi, deri të shtunën të gjithë presin se çfarë do të përgatisë Mema me skuadrën e tij.
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Fri Apr 25, 2008 6:31 pm Post subject:

Devi Muka: Tirana, favorite
25 Prill Kapiteni i bardhebluve, Devi Muka, thotë se duhej të kishte udhëtuar drejt Austrisë, për të kontrolluar gjurin e dëmtuar, por shkak për vonesën është bërë derbi me të kuqtë. “Qëndrova edhe ca ditë, ? thotë Muka, ? enkas për të qenë i pranishëm në fitoren e Tiranës, e cila për mua është më e favorizuar”. “Vlonjati fluturues” sikur do të plotësojë atë boshllëk, që i është krijuar atij, por edhe shokëve të skuadrës dhe dashamirësve të shumtë të Tiranës, për shkak të mungesës aq të gjatë të tij në fushë. Nuk i kishte ndodhur kurrë gjatë karrierës një mungesë e tillë kaq e gjatë, ndërsa dhe ndeshja e tij e fundit në derbin me Partizanin, rezulton të jetë e largët, në mbrëmjen e 17 dhjetorit 2006, kur Tirana fitonte 3?2 dhe kapiteni kishte shkëlqyer mbi të gjithë. “Nuk e ekzagjeroj aspak kur them se gjithçka flet për gjendjen e mirë që gëzon grupi bardheblu në të tërë elementët” shprehet Muka. Ndërkohë, i kemi kujtuar disfatën në “shtëpi” me Elbasanin, të mërkurën. “Gjëra që ndodhin, ? shton kapiteni, ? sidomos në ndeshjet e Kupës. Megjithëse, për mendimin tim, skuadra ra pre e “kurthit” të elbasanasve, që patën trumbetuar se do të vinin në Tiranë me futbollistë të rinj. Tashmë, edhe pse me siklet të madh, ajo u kapërcye. Askush nuk duhet ta kujtojë më atë ndeshje”, ka përfunduar kapiteni, që edhe këtë derbi do ta ndjekë nga tribuna.

Laurent Mohelebi: Eshtë radha jonë!

I ka lënë një shije jo pak të hidhur disfata e së mërkurës me Elbasanin, madje, ajo fare qartë pasqyrohej në mimikën e fytyrës së francezit të bardhebluve, Laurent Mohelebi. “Gjithsesi, ? thotë mesfushori francez, ? i rëndësishëm është fakti që Tirana tashmë është finaliste e Kupës së Shqipërisë. Madje, pikërisht për këtë fakt mua më vjen shumë mirë. Them kështu, sepse për çdo futbollist është arritje të luajë në finalen e një Kupe. Megjithatë, tani për tani nuk është koha të flasim për të. Në këto çaste, të gjithë jemi të përqendruar te derbi me Partizanin”. Dhe Loreni, siç i thonë tashmë të gjithë në kampin bardheblu, e ka ende të gjallë në kujtesën e tij disfatën e rëndë, që ka pësuar skuadra në atë mbrëmje jo fort të largët të 1 marsit. “Demain, notre tourne (nesër është radha jonë) ? thotë ai në frëngjisht ? për të fituar. Dhe kam bindje të plotë që kështu ka për të ndodhur. Jemi në grand formë”, ka përfunduar Mohelebi. Bedri Alimehmeti
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Sat Apr 26, 2008 1:48 pm Post subject:

Mema: Pak të thuhet “ndeshje e jetës”
26 Prill Në prag të derbit të sotëm me të kuqtë e Partizanit, dy kanë qenë problemet, që e kanë shqetësuar kreun e pankinës bardheblu, Sulejman Mema: goditja që mori skuadra në mesjavë, në ndeshjen e kthimit gjysmëfinale për Kupën e Shqipërisë me verdheblutë e Elbasanit, ku rrezikoi daljen në finale, dhe mungesat në qendër të mbrojtjes të dy titullarëve, Kçira e Vrapi. Gjithsesi, i ndërgjegjshëm përpara një situate të tillë, Mema, i spikatur për kërkesën në punë, edhe pse ka patur shumë pak kohë në dispozicion me “bisturinë” e tij ka ndërhyrë në skuadër. “Do ta shihni në fushën e lojës, ? thotë trajneri i bardhebluve, ? ku fare lehtë mund të konstatoni se çka jemi përpjekur të bëjmë. Kurse, përsa i përket goditjes që morëm nga Elbasani në mesjavë, kam punuar shumë me grupin në planin psikillogjik, ndaj shpresoj që atë ndeshje tashmë futbollistët e mi ta kenë harruar”.

Mungesat, fotokopje

Më pas, duke u ndalur te mungesat në formacionin e skuadrës së tij, për “Sport Ekspres” Mema ka treguar: “Kurrë nuk do të më kishte shkuar ndërmend, që edhe në këtë takim derbi në mesin e repartit të mbrojtjes do të më mungonin po të njëjtët futbollistë: Kçira e Vrapi. E çuditëshme! Fotokopje e ndeshjes së kaluar. Dhe në këtë drejtim mua më vjen vërtet keq, sepse, për hir të së vërtetës, duhet thënë se Kçira e Vrapi kishin arritur më në fund të gjenin gjuhën e përbashkët në funksionimin midis tyre. Kishte disa ndeshje që ky binom, në qendër të mbrojtjes sonë, po tregohej shumë i saktë në veprime. Pa thënë që edhe pësimi i golave, për gabime të tyre, qe minimizuar”.

Porosia

Përpara se të niste stërvitjen e djeshme, Mema, bashkë me stafin e tij, u ka folur për disa minuta grupit të futbollistëve, ndërsa ishin përballë tij në fushën e “Skënder Halilit”. “Nesër (sot) kemi për të luajtur një ndeshje mjaft të rëndësishme, ? u ka thënë ai, ? të cilën unë them se është pak ta quaj të “jetës”, siç jemi mësuar të themi rëndom në raste përballjesh të tilla. Gjithçka varet nga ju. Kohët e fundit, në kampionat keni zhvilluar ndeshje mjaft të mira dhe kjo është mundësuar falë përkushtimit e impenjimit tuaj në stërvitjet e përditëshme. Pra, asgjë nuk ju është dhuruar, por e keni fryt të djersës e të mundit tuaj. Ndaj, që asnjë pikë e tyre të mos u shkojë dëm, në derbi i derdhni pa kursim të gjitha energjitë në fushën e lojës. Sepse vetëm kështu do të dilni fitues dhe do jeni dinjitozë”.

Mjeku Ostreni: Hyka “ok”?ej

Në kampin bardheblu ka ngrohur shumë fakti që, më në fund, Jahmir Hyka e ka kapërcyer dëmtimin. Në këtë aspekt bind edhe ajo që thotë mjeku i ekipit, Mel Ostreni. “Situata është e normalizuar, ? u shpreh ai ? hematoma, që ka pësuar futbollisti, tashmë është drejt zhdukjes p`rfundimtare. Pra, Hyka është në kondicionin e duhur për derbin me Partizanin”. Ndërkohë, edhe vetë fantazisti i talentuar i bardhebluve u shpreh me optimizëm për gjendjen e tij. “Nuk kam asnjë problem, ? tha ai, ? kontrolli i fundit, që kreva në klinikën e doktor Melit, rezultoi “ok”?ej”.

Kçira, i dënuar për të mos qenë sot

Ashtu si edhe në derbin e 1 marsit, shqiptari me pasaportë kroate, Lekë Kçira, nuk do të jetë në fushë. Herën e kaluar i mungoi skuadrës ngaqë në ndeshjen me Teutën, në “Niko Dovana”, qe ndëshkuar me karton të kuq, kurse sot sërish nuk do të jetë, sepse ka plotësuar numurin tre të kartonave të verdhë. “Dëshirën, ? thotë Kçira ? e kam pasë të madhe për të qenë në derbin numër 1 të kampionatit shqiptar, por nuk paska qenë e thënë. E çuditëshme vërtet! Madje, edhe për të ardhur keq, sepse të gjithë futbollistët dëshirojnë të jenë protagonistë në derbi. Por duket se unë paskam qenë i “dënuar”!

Tifozi, derbi 120 LIVE

I moshuar, tashmë mbi 70 vjeç, Eros Vokopola është pa dyshim tifozi më i qetë e më korrekt i Tiranës, që prej vitesh e ndjek skuadrën bardheblu, jo vetëm në ndeshjet brenda e në transfertë, por edhe në stërvitjet e përçdoditëshme. Tregojnë për të se, edhe ditën kur është martuar, sa ka futur bashkëshorten në shtëpi, me kostumin e dhëndrit ka nxituar të ndjekë Tiranën në stadium. Nga ato çka na thotë vetë, derbi i 130?të, Partizani?Tirana, që do të luhet sot pasdite në “Qemal Stafa”, për të do të jetë i 120?ti, që ai ka ndjekur LIVE në stadium. “Nëntë ndeshje derbi, ? thotë si gjithnjë i qetë Eros Vokopola, ? nuk kam arritur t’i ndjek për shkak të ndonjë shërbimi apo angazhimi tjetër që kam patur”.

Në derbi, me tjetër sekretar

Pa u mbushur 48 orë nga mbrëmja e së shtunës së 1 marsit, kur bardheblutë patën humbur derbin me të kuqtë, 1?4, paraditen e së hënës, Shkëlqim Muça pati dhënë dorëheqjen e parevokueshme nga posti i sekretarit të klubit Tirana. Tashmë, që prej tri javësh, në karriken e kryezyrtarit të FK Tirana është ulur Eduard Gjini. Pra, derbi i sotëm me të kuqtë e gjen Tiranën me tjetër sekretar.

Donatorët, mbrëmë pranë futbollistëve

Mbrëmë, rreth orës 22:00, mësohet se katër donatorët e Tiranës, Shefikat Ngjela, Agron Papuli, Avni Nuri e Refik Halili, kanë lënë kryeqytetin dhe i janë gjendur pranë skuadrës së tyre, në “Linza Chateau”, ku bardheblutë kanë kaluar natën. Ata i kanë garantuar futbollistët për mbështetjen e tyre të vazhdueshme dhe ua kanë përsëritur edhe një herë kërkesën, për t’i bërë mbyllje dinjitoze kampionatit. Gjatë takimit futbollistët bardheblu kanë uruar donatorin Refik Halili, për fitimin e titullit kampion nga ekipi i volejbollit femra të SK Tirana, president i të cilit ai është që në fillim të këtij sezoni.

“Timonierët”, nga dy familje tiranase me tradita

Në derbin e sotëm midis Partizanit e Tiranës tërheq vëmendjen fakti që, në krye të të dy pankinave respektive, do të jenë Hasan Lika e Sulejman Mema. Dy pinjollë të familjeve të nderuara autoktone tiranase autoktone, që ndër vite i kanë dhënë shumë sportit shqiptar, në veçanti futbollit. Nga familja Lika përmenden emrat e Petritit (i ati i Hasanit) dhe Agimit (xhaxhait), të dy ish?arbitra të njohur e më pas vëzhgues. Po kështu, nga familja Mema përmeden Haxhiu (i ati i Sulejmanit) dhe Aliu e Osmani (xhaxhallarët), të tre futbollistë nga më të spikatur në të kaluarën. S.Mema e H.Lika kanë drejtuar edhe pankinat e kuqezinjve U?21, pa thënë që edhe si futbollistë kanë veshur fanellën kuqezi të kombëtares. Këto janë të përbashkëtat, kurse ndryshimi konsiston në faktin që nga Likët, deri tani, asnjë nuk ka luajtur me fanellën bardheblu, kurse nga Memët, Haxhiu e Osmani kanë fituar edhe tituj me fanellën e kuqe, pa harruar që Sulejmani e ka drejtuar Partizanin nga pankina
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Thu May 01, 2008 6:19 pm Post subject:

Gjini: Flijeni mendjen, toleranca do jetë zero
1 Maj I shqetësuar jo pak, për çka është thënë e shkruar këto ditë në media, lidhur me faktin, nëse do lëshojë apo jo Tirana në derbin e së shtunës me Dinamon, Eduard Gjini, drejtuesi i ri i klubit bardheblu, për “Sport Ekspres” është shprehur: “Ditë më parë e kam bërë të qartë në shtyp, se porosia e donatorëve për futbollistët tanë është, që pavarësisht nga fakti që i vetmi objektiv për klubin tonë ka mbetur Kupa e Shqipërisë, skuadra duhet të jetë e impenjuar në të gjitha ndeshjet. Ajo duhet të luajë me statusin e kampiones në fuqi, për t’i bërë mbyllje sa më dinjitoze kampionatit. Për fat të mirë, për shkak të një mbledhjeje që kemi patur në FSHF, jam takuar me drejtuesit e dy klubeve, Partizanit e Dinamos, të cilëve u kam thënë se Tirana të gjitha ndeshjet ka për t’i luajtur ndershërisht dhe drejt, si të ishte në luftë për titull, ndaj flijeni mendjen, sepse toleranca jonë do të jetë zerro”.

Ndeshje kontrolli me të rinjtë

Ndryshe nga herët e tjera, në ndeshjen e kontrollit, që Tirana ka zhvilluar dje në “Skënder Halili” me ekipin e të rinjve të trajnerit Ilir Muça, tekniku Mema, me rreshtimin që i ka bërë në fushë skuadrës, në të dyja pjesët prej 30 minutash, ka synuar realizimin e dy objektivave. Skuadra do të luajë dy ndeshje të rëndësisë së veçantë: të shtunën, në “Selman Stërmasi”, derbin kryeqytetas nr.2 me Dinamon për kampionat, kurse të mërkurën e ardhshme, në “Ruzhdi Bizhuta” të Elbasanit, finalen e Kupës së Shqipërisë me Vllazninë e Shkodrës. I impenjuar që gjithçka të shkonte sipas asaj që kishte menduar ai, Mema gjatë gjithë kohës u ka qëndruar futbollistëve të tij mbi kokë duke kërkuar të jenë të saktë në zbatimin e detyrave.
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Tue May 06, 2008 2:12 pm Post subject:

Hyka: “Nuk e bëj dot Maradonën”
6 Maj Ku e gjeni një lojtar si ky? Është 20 vjeç, është po aq i famshëm në Shqipëri sa ndonjë prej lojtarëve më të mëdhenj në Botë, por kur e sheh jashtë fushës së blertë nk është ai që të gjithë presin. Sepse njerëzit nga njerëz të tilla presin, ndonjë adoleshent “të vonuar” me makinë luksoze, celular me “20” dhe ndonjë femër të këndshme në krah. Hyka nuk është tipi i futbollistit modern. Në rrugë përshembull është vështirë ta njohësh. Nuk ka asnjë makinë, dhe nuk mban telefon me kontratë. Merr vetëm 2 milionë lekë të vjetra në muaj (të jemi realistë një rrogë e tillë për futbollin nuk është kushedi se çfarë) dhe sillet si një fëmijë dhe një i rritur njëkohësisht. Tani pasi ka kaluar 9 muajt e parë profesionistë në futbollin shqiptar ka diçka për të thënë. Sepse ka qenë një Hykë gjithnjë e në rritje. Në fillim pritej të bënte Maradonën, më pas nuk bënte dot as Hykën. Tani i bën të gjitha mirë. Ka pasur sigurisht sekretet e tij në këto 9 muaj. Që dëshiron t’i finalizojë me një tjetër trofe.

Nesër finalja e Kupës. Finalja e parë e Hykës?

Jo, sepse në ndeshjen e parë zyrtare me Tiranën verën e shkuar, fitova superkupën. Dhe mbaj mend që luajta mirë, ishte impakti i parë me publikun bardheblu dhe të gjithë më brohoritën.

Megjithatë një Hykë si ai i Besës për muaj nuk e pamë?

Ndoshta deri në janar kisha gjithnjë mendjen te merkato. Pastaj nuk është se luaja gjithnjë titullar. Ndonjë problem në grup edhe ishte. Nuk po menaxhoja dot situatën. Shumë thonin që nuk e meritoja famën, ndërkohë që askujt nuk i kërkova asnjë famë. Gjithçka erdhi vetë.

Çfarë ndodhi pas janarit?

Presioni ra, marëdhënia me skuadrën u bë shumë e mirë. Nuk e mohoj që më ka ndihmuar shumë edhe Duro. Tani jemi miq të mirë dhe gjithnjë i dëgjoj këshillat e tij. Unë gjithashtu nuk mendoja më për t’u larguar dhe thashë me vete: luaj futboll, bëj atë që di. Në ndonjë rast e teproja me pasimet, ndërkohë që të gjithë më thonin që arma më e fortë është driblimi.

Por jo goli?

Kuash tha? Kam shënuar kundër Elbasanit dhe nuk ka qenë gol i shëmtuar

Nesër nuk do të jetë një ndeshje si gjithë të tjerat?

Vllazninë e kemi mundur 5?1 në takimin e fundit në kampionat, por nuk besoj se do të jetë ajo Vllazni. Megjithatë ata pa Sinanin, në letër janë më të dobët.

Në ndeshjen e fundit me ta Kotrri nuk ka arritur të të mbajë dot?

Po ndoshta edhe Kotrri do të ndryshojë, ose trajneri i Vllaznisë do të gjejë një tjetër lojtar për të më mbuluar.

E ke nisur me Kupë dhe mund ta mbyllësh me Kupë?

Po unë doja kampionatin, dhe kur erdha këtu isha i bindur që do kisha marrë kampionatin. Tani kur shoh trajnerin Mema sa rëndësi i kushton ndeshjes së nesërme e kuptoj që edhe Kupa është një gjë e mirë. Është praktikisht një biletë për të shkuar në Evropë.

Starova, Hafizi, Mema, nuk ke ndërruar pak trajnerë?

Me Memën ndjehem shumë mirë, mendoj se është më mirë për të folur për të tashmit. Mema më ka dhënë shumë kurajo. Vlerësoj shumë edhe dy paraardhësit.

Në verë me siguri do të ketë një Hykë i tëri në merkato?

Të mos nxitohemi. Më parë duhet të fitojmë këtë Kupë, pastaj pse jo të luaj në Kupat e Evropës me Tiranën. Ka kohë deri më 31 gusht. Megjithatë asnjë veprim nuk do bëhet pa u konsultuar me drejtuesit e Tiranës. U jam shumë borxhlinj atyre dhe tifozëve bardheblu, sepse më anë mbështetur shumë.

Nuk ka asnjë skuadër të huaj që të kërkon?

Unë dëgjoj përditë skuadra deri nga vendet më të çuditshme. Disa madje më thonë që ka skuadra në afërsi të Alaskës që të kërkojnëqesh po kjo është merkato. Nuk është kaq lehtë dhe jo çdo interesim është zyrtar.

Ndërkohë që vijon të kalosh muajin e mjaltit në përfaqësuese?

Kam pasur vetëm një dëshirë që pas ikjes së Bariçit, që trajneri i ri të më grumbullojë një ndeshje. E dini pse, për t’u treguar të gjithëve se ndoshta edhe në kohën e kroatit e kam merituar pozicionin në përfaqësuese. Dëgjoja aq shumë zhurmë rreth grumbullimit tim, ndërkohë që unë luaja te Rozenborg. Pyesja veten, gjithë këta specialistë futbolli që janë kundër meje në Kombëtare a thonë gjithnjë se duhet bërë rinovimi. Bariç gjithnjë me qetësonte. Më thonte që në fund të fundit askush nga ata nuk kanë veto për të zgjedhur lojtarët e përfaqësueses, dhe nëse gabon dikush ky është trajneri.

Po Han çfarë të tha?

Më duket i rreptë në fillim, pastaj kur filloi të bënte batuta u qetësova. Mendoj se është njeri i këndshëm dhe normalisht duhet të jetë trajner i zoti me atë karrierë që ka.

Ndonjë detyrë shtëpie?

Më tha të bëja shumë stërvitje dhe të prentedoja që në kohë të shkurtër të shkoja në një kampionat të huaj. Sigurisht që nuk më garantoi një vend titullari.
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Thu May 08, 2008 3:15 pm Post subject:

Tirana kthehet në skandal bardheblu
8 Maj

Ndonjë dyshim edhe ishte. Sepse trajneri Mema vetëm të kishte “rrjedhur”. Në fillimin e pjesës së dytë të gjithë ngritën supet, si ka mundësi që nuk ishin tre titullarë. Tre zëvendësime në pushim?

Ngjarja – Nuk ka filluar gjithçka në pushim. Donatorët pretendojnë se kanë pasur sinjalizime. Që të premten se disa futbollistë të Tiranës janë blerë nga Vllaznia për këtë finale kupe. Një histori tipike shqiptare. Të gjithë vënë bast që edhe nëse Vllaznia do të humbiste të njëjtën gjë do të kishte bërë edhe Fushaj. Pak rëndësi ka kjo. Në pushim të ndeshjes, skuadra shkon në dhomat e zhveshjes me humbjen 0?2 mbi shpatulla dhe Mema gjen fajtorët. “Duro dhe Sina të vishen nuk do luajnë më”. Duro i ka kërkuar sqarime, madje i ka thënë që duhet të qëndrojë më shumë në fushë. Mema nuk ka pranuar. Ndërkohë donatorët kanë zbritur në dhomat e zhveshjes. Menjëherë kanë thënë që përveç Duros dhe Sina e Vrapi nuk do luajë pjesën e dytë. Mema nuk e ka kundërshtuar veprimin e tyre. Vrapi ka kërkuar sqarime dhe donatorët kanë thënë që këta tre futobllistë kanë shitur ndeshjen për 100 mijë euro. Madje Vrapin goditjen me shtyllë nuk ka dashur vetë ta dërgojë në rrjetë. E pabesueshme që dikush të mendojë për gjëra të tilla. “Jetojmë në Tironë”.

Pas ndeshjes – Skuadra është totalisht e çorientuar. Donatorët kanë vendosur që të tre futbollistët të përjashtohen dhe të mos jenë më pjesë e Tiranës, ndërkohë që të tre këta lojtarë kanë udhëtuar në mënyra të ndryshme dhe jo me skuadrën drejt Tiranës. Me pyetjen mbi shpinë. “Çfarë mëkati kemi bërë”. Dhe sigurisht që janë ndjerë të tradhëtuar, mbi të gjitha nga trajneri i tyre

Zërat – në fund të gjithë shtojnë nga një element. Ka edhe nga ata që një nga donatorët mund të ketë ngritur edhe duart ndaj ndonjë lojtari, por kjo të paktën mbetet një gjë e paverifikuar. Kjo fundja nuk ka ndonjë rëndësi ekstreme. E rëndësishme për kampin bardheblu është skandali i krijuar. Në sytë e presidentit të federatës, presidentit të Republikës dhe zëvendëstrajnerit të përfaqëuseses, belgut De Jong. Çfafrë imazhi.

E vërteta – Lojtarët janë të bindur në pafajësinë e tyre. Dikush zyrtarisht e dikush jo shprehen qartë që të gjitha këto akuza janë shpifje të rënda mbi moralin e tyre dhe dikush duhet të mbajë patjetër përgjegjës për këto deklarata të lëshuara. Në fund e mbyllin me refrenin e zakonshëm. “Kjo është Shqipëria”. Të besosh që të tre futbollistët kanë përfituar 100 mijë euro për të mos u impenjuar sa duhet në një finale kupe është e vështirë. Më e lehtë është që si rëndomë drejtuesit e një skuadre shqiptare kanë prodhuar fantazinë e radhës kundrjt lojtarëve të tyre.

E ardhmja – Tirana përfundimisht është një skuadër e shpërbërë, një skuadër në krizë. “Tre ndeshjet e mbetura të luhen si të luhen, pastaj fillon revolucioni”, deklarojnë burime pranë klubit. Në të vërtetë e gjitha ajo që ndodhi ka një shpjegim më shumë se sa teknik. Humbja mund të ketë ardhur edhe si pasojë e një vetkënaqësie të theksuar që klubi bardheblu shijoi dhe pas fitores 5?1 kundër shkodranëve në kampionat. Madje atje në fushën stërvitore, “Skënder Halili”, të gjithë ishin të bindur se kjo skuadër do merrte kupën dhe do shkonte në Evropë. Më pas, kur e kanë parë veten në një 0?2 (mund t’i ndodhë kujtdo) kanë gjetur fajin dhe fajtorët. A e kanë menduar ndonjëherë të gjithë atje, në shtëpinë e çuditshme bardheblu, se ndonjëherë kundërshtari mund edhe të luajë më mirë se ata?!
_________________
Ngjyr e kuqe ngjyr dashnie e ka frik cdo mi bashkie

Partizani_One · Posted: Thu May 08, 2008 3:17 pm Post subject:

Duro: “Më vjen keq që jam pjesë e këti futbolli shqiptar”
8 Maj Klodian Duro, pas ndeshjes së djeshme ka deklaruar: “Më vjen keq që jam pjesë e këtij futbolli. Drejtuesit e skuadrave shqiptare duhet patjetër të kuptojnë që nuk është ky futbolli i duhur. Dikush duhet të ndërhyjë për të saktësuar gjërat. Duhet patjetër që të ndërhyrjë edhe shteti, sepse në Shqipëri askush nuk kupton kush është presidenti, kush është trajneri e kush janë lojtarët. Të akuzosh lojtarë që kanë dhënë shpirtin për këtë skuadër, që e kanë marrë për dore dhe e kanë dërguar deri në finale është e turpshme. Kemi luajtur të sëmurë, të dëmtuar dhe madje edhe në ndonjë rast në gjendje jo të mirë humori vetëm për të shpëtuar edicionin dhe sezonin bardheblu. Në fund ofendohemi”.

_________________
Ngjyr e kuqe ngjyr dashnie e ka frik cdo mi bashkie

	Futbolli Shqiptar Forum Index -> Superliga	All times are GMT + 1 Hour Page Previous 1, 2, 3, 4, 5, 6, 7, 8, 9, 10 Next
Page 9 of 10